Природниот процес на стареење на кожата не можеме да го елиминираме, но секако дека можеме да влијаеме на неговото темпо. Пред да почнете да размислувате за скапи третмани и козметики, помислите што можете вие да направите за вашата кожа.

Избегнувајте директна изложеност на сонце. И покрај тоа што сите припаднички на понежниот пол уживаат во темниот тен на кожата, сонцето е еден од главните виновници за појава на брчки. Дерматолозите препорачуваат да се става крема за заштитен фактор дури и при минимално изложување на сончевите зраци кога има висок индекс на УВ зрачење. Се смета дека 90% од стареењето на кожата е предизвикано токму од штетново влијание на сонцето.

Одберете ја вистинската крема. При изборот на крема, одберете ја онаа која не содржи многу парфем и состојки кои ја иритираат кожата. Одберете неутрален крем со високо хидратантно својство. На тој начин вашата кожа ќе го добие она што и е потребно. Несоодветните креми ја иритираат, сушат и оштетуваат кожата.

Внимавајте на шеќерот.  Шеќерот и рафинираните јаглехидрати го зголемуваат нивото на инсулин, кој претставува вистинска инфламаторна бомба во телото. Се смета дека инсулинот е причината за појава на воспалителни промени на кожата и телото. Оптималното ниво на шеќер е потребно за млада и здрава кожа, но секоја отстапка од нормалното води до оштетување на кожата. Дајте и го на кожата тоа што и треба – овошје, зеленчук и многу вода.

Чист воздух. Бројни истражувања докажале дека загадениот воздух, издувните гасови од автомобилите и маглата во која се задржани сите штетни честички делуваат негативно на целото здравје вклучувајќи го и изгледот и здравјето на кожата. Искористете го слободното време и отидете на планина во потрага по свеж и чист воздух.

Спијте. Недоволното и неквалитетно спиење ја старее кожата. Ваквиот ефект е зголемен со текот на годините. Хроничното неспиење го зголемува нивото на хормонот на стрес кој пак влијае и во зголемувањето на нивото на инсулинот.  Сè  што ви треба е добар 6-8 часовен сон и вашата кожа ќе ви биде благодарна.

Откажете ги цигарите. Како резултат на пушењето доаѓа до стегање на крвните садови кои ја хранат кожата, а со тоа кожата добива помалку хранливи материи и побрзо старее. Дополнително, како резултат на пушењето (вдишувањето) се јавуваат брчки околу устата.