Pirja e antibiotikëve pa rekomandimin e mjekut, mund të shkaktojë pasoja të cilat me siguri as që i keni menduar. A e dini se përdorimi i tyre në mënyrë të papërshtatshme apo të panevojshme, mund të shkaktojë dëmtim të veshkave si dhe dëmtime serioze të mëlçisë?
Antibiotikët janë ilaçe të cilat ndikojnë me sukses në trajtimin e baktereve. Por, ato ndikojnë me suskses vetëm nëse merren me rekomandimin e mjekut dhe në dozën e duhur. Në të kundërt, ato mund të jenë krejtësisht të padobishëm, madje, mund të shkaktojnë edhe komplikime të tjera shëndetësore. Mos harroni se, antibiotokët nuk janë ilaçe të cilat i pini kur ju dhemb koka apo kur keni temperaturë. Shpesh ndodh që nënat ti japin antibiotik fëmijës, kur vërejnë se fëmija ka temperaturë, por temperaturë nuk shfaqet vetëm si rezultat i infeksionit bakterial, prandaj ky vendim është i paqëndrueshëm.
Rezistenca e baktereve mund të jetë vdekjeprurëse
Kur bakteria bëhet rezistente ndaj antibiotikut, atëherë, ky i fundit e humbet ndikimin e tij dhe nuk mund të veprojë në shkatërrimin e bakteres. Si rezultat i kësaj, sëmundja mund të zgjasë më tepër duke humbur kohë dhe duke shpenzuar më tepër para në kërkim të ilaçit të duhur.
Pesë problemet më të mëdha të shkaktuara nga përdorimi i pakontrolluar dhe i papërshtatshëm i antibiotikëve
Antibiotikët bëjnë pjesë në grupin e ilaçeve të rënda të cilat mund të shkaktojnë efekte anësore në rast se abuzohet me përdorimin e tyre.
Reaksionet alergjike të rënda: Duke filluar nga shkalla më e lehtë e reaksioneve alergjike të shoqëruara me kruarje të lëkurës, deri tek alergjitë të cilat mund të shkaktojnë vdekjen.
Dëmtim të mëlçisë: Përdorimi i gabuar i antibiotikëve mund të shkaktojë dëmtim të mëlçisë. Për të matur shkallën e dëmtimit, duhen bërë analizat e gjakut. Pacientët të cilët kanë funksion të dëmtuar të mëlçisë, duhet të shmangin përdorimin e antibiotikëve të cilët përpunohen në mëlçi.
Dobësim të veshkave: Antibiotikët mund të kenë efekt toksik mbi veshkat dhe mund të jenë shkak për shfaqjen e dobësimit të tyre. Të paktën 5% e rasteve të dobësimit të veshkave janë të shkaktuara nga keqpërdorimi i antibiotikëve.
Diarre: Antibiotikët i shkatërrojnë edhe bakteret e mira të cilat jetojnë normalisht tek zorrët, duke shkaktuar në këtë mënyrë shfaqjen e diarresë. Në disa raste të caktuara mund të shfaqet edhe gjak në jashtëqitje.
Mbipeshë: Studimet e fundit kanë treguar se personat të cilët gjatë fëmijërisë së tyre kanë pirë shpesh antibiotikë, janë më tepër të rrezikuar nga shfaqja e mbipeshës trupore.
Çrregullim digjestiv: Përveç shfaqjes së diarresë, antibiotikët kanë edhe efekte të tjera anësore si: përzierje, të vjella dhe dhimbje barku.
Tregohuni të kujdesshëm gjatë përdorimit të antibiotikëve:
- Nëse nuk i keni marrë me rekomandim të mjekut. Antibiotikët nuk ndikojnë ndaj griprave.
- Mos pini antibiotik vetëm sepse miku juaj ka pirë kur ka pasur të njejtat simptoma me ju.
- Mos e ndërprisni dozën vetëm sepse tani ndiheni më mirë. Merreni të gjithë dozën e rekomanduar nga mjeku. Ndërprerja apo kapërcimi i dozës mund ta bëjë bakteren rezistente ndaj këtij ilaçi.
